Nga 1 nëntori zyrtarisht dhe de fakto nga sot, shërbimi i hemodializës ka kaluar në administrimin e Operatorit të Shërbimeve të Integruara Shëndetësore (OSHISH), pas përfundimit të kontratës koncesionare.

Në këtë mënyrë ka marrë fund një proces pagesash shumë miliardëshe që përfituan spitale private në Shqipëri.

Ministrja e Shëndetësisë Klodiana Spahiu tha sot se përparësi mbetet garantimi i vijimësisë, sigurisë dhe cilësisë së këtij shërbimi jetik, pa ndërprerje për pacientët.

"Ekipet janë angazhuar në përgatitjet përfundimtare për funksionimin e plotë të shërbimit nga 2 nëntori, duke vendosur në qendër të çdo mase sigurinë dhe kujdesin ndaj pacientëve", tha Ministrja e Shëndetësisë, Klodiana Spahiu.

Ajo theksoi se fokusi kryesor i këtij tranzicioni mbetet mbarëvajtja e procesit mjekësor për të gjithë pacientët që marrin këtë shërbim.

Sipas ministrisë, asnjë ndryshim në strukturat menaxhuese nuk do të cenojë marrjen e kujdesit mjekësor. Për Spahiun, “pacienti është mbi çdo ndryshim administrativ dhe sinteresi i pacientit mbetet prioritet absolut”.

Ministrja tha se ka nisur shpërndarja e materialeve dhe sistemimi i furnizimeve mjekësore në qendrat kryesore të hemodializës në rrethe, përfshirë ato të Shkodrës, Lezhës, Elbasanit dhe Korçës. Synimi është që shërbimi të jepet çdo ditë pa ndalim.