TIRANË — Rreth 21 për qind e arrestimeve të kryera nga Policia e Shtetit gjatë protestave antiqeveritare dhe studentore të javëve të fundit janë vlerësuar si të paligjshme nga Gjykata e Tiranës dhe prokuroria, sipas të dhënave të publikuara nga Rrjeti Gazetarsik për Raportimin e Hetimit në Ballkan (BIRN).

Nga 319 protestues të arrestuar që prej 13 tetorit deri më 31 tetor, 291 prej tyre janë përballur me togat e zeza për vlerësimin e masës së sigurisë, ku 62 arrestime u shpallën në shkelje të ligjit. Mes të ndaluarve numërohen 38 të mitur, nga të cilët gjashtë raste u cilësuan të paligjshme nga gjykata. Përgjatë kësaj periudhe, vetëm 12 persona janë lënë në arrest me burg, tetë në arrest shtëpie, ndërsa masa më e zakonshme ka qenë ajo e detyrimit për paraqitje për 157 protestues.

Ekspertët ligjorë dhe avokatët mbrojtës kanë ngritur shqetësime serioze për përdorim jo-proporcional të forcës, mungesë të provave individuale, intimidim dhe shkelje të të drejtave të njeriut gjatë shoqërimeve. Pavarësisht se Policia e Shtetit nuk e ka pranuar zyrtarisht tejkalimin e kompetencave, drejtues të Policisë së Tiranës u kanë kërkuar komisariateve respektimin e legjislacionit penal për të miturit, nën hijen e pretendimeve për kontrolle arbitrare të telefonave dhe dhunë gjatë procesit të shoqërimit.