TIRANË — Kontrolli i Lartë i Shtetit (KLSH) ka publikuar raportin përfundimtar mbi zbatimin e buxhetit të shtetit për vitin 2025, duke dhënë një konkluzion të kualifikuar për shkak të shkeljeve të panumërta financiare, prokurimeve pa mbulesë buxhetore dhe keqadministrimit të të ardhurave publike.

Sipas raportit të KLSH-së, auditimet kanë evidentuar 171.9 milionë lekë dëm ekonomik të drejtpërdrejtë dhe 12.3 miliardë lekë efekte financiare negative, me një faturë totale që arrin në rreth 12.5 miliardë lekë (afërsisht 135 milionë euro).

Prokurime 16.8 miliardë lekë pa fonde dhe shkelje në investime

Akti auditues zbardh mangësi të rënda në menaxhimin e investimeve publike:

Prokurime pa mbulesë: Në 44 raste janë çelur procedura prokurimi me vlerë 16.8 miliardë lekë, ndonëse fondet në dispozicion ishin dukshëm më të ulëta.

Overkontraktim: Në 39 projekte janë marrë angazhime financiare që tejkalonin fondet e miratuara me një diferencë prej 4.28 miliardë lekësh.

Parapagime abuzive: Tre projekte investimi përfituan 1.15 miliardë lekë parapagime pa dokumentacion mbështetës, ku në dy raste (841.7 milionë lekë) mungonte miratimi i Ministrit të Financave, duke arritur në 20% të vlerës së kontratës (pothuajse dyfishi i kufirit ligjor prej 10%).

Fonde pa projekte: U çelën 5.26 miliardë lekë për investime pa asnjë projekt konkret, ndërsa 188 projekte me fonde prej 3.59 miliardë lekësh mbetën me zero realizim në fund të vitit.

Ndryshime buxhetore pas mbylljes së vitit dhe dështim i sistemeve IT

KLSH ka konstatuar se plani buxhetor i vitit 2025 pësoi 28,412 ndryshime operative. Mjaft problematike mbetet kryerja e rishikimeve buxhetore pas afatit ligjor të 15 nëntorit, ku ndryshimet vazhduan deri në muajin shkurt 2026.

Gjithashtu, sistemi informatik i financave publike (SIMFSH) ka funksionuar pa mbështetje teknike që prej korrikut 2024, çka i ka detyruar institucionet t’i rikthehen dorëzimit fizik të dokumenteve në Thesarin e Shtetit. Si pasojë, 748 njësi shpenzuese dorëzuan jashtë afatit 25,793 fatura me vlerë 64.24 miliardë lekë, ndërsa 5,868 kontrata me vlerë 119.55 miliardë lekë u regjistruan me vonesa të mëdha.

Borxhi tatimor e doganor arrin në 256 miliardë lekë Administrimi i të ardhurave tregon përkeqësim të theksuar të mbledhjes së detyrimeve:

Borxhi Tatimor: Arriti në 194.43 miliardë lekë (rritje prej 19.6% ose 31.9 miliardë lekë brenda një viti), ku 60% e totalit përbëhet nga detyrime më të vjetra se 5 vjet.

Borxhi Doganor: U rrit me 25.9%, duke kapur shifrën e 61.83 miliardë lekësh (77% detyrime të vjetra).

Total Stoku: Detyrimet e papaguara ndaj shtetit kapën vlerën e 256.27 miliardë lekëve.

"Ethet" e dhjetorit: Mbi 20% e shpenzimeve u kryen në muajin e fundit

Raporti nërvijëzon se ekzekutimi i buxhetit u karakterizua nga pabarazi të mëdha përgjatë vitit. Vetëm gjatë muajit dhjetor 2025 u realizuan 162.54 miliardë lekë shpenzime (20.3% e totalit vjetor). Kjo përmbysi bilancin fiskal nga një suficit prej 49.12 miliardë lekësh që ishte deri në nëntor, në një deficit vjetor prej 47.09 miliardë lekësh pas shpenzimeve masive të dhjetorit.