EVROPË — Vala e protestave rinore të udhëhequra nga "Gen Z" ka përfshirë disa shtete evropiane, ku kërkesat për përmirësimin e arsimit, uljen e kostos së jetesës dhe ndalimin e korrupsionit janë shoqëruar me incidente të rënda dhune, përplasje me forcat e rendit dhe dëme materiale.

Në Francë, mbi 320 mijë demonstrues dolën në rrugët e Parisit, Marsejës, Lionit e qyteteve të tjera. Autoritetet franceze kryen mbi 770 arrestime, ndërsa Prokuroria e Parisit nisi një hetim për tentativë vrasjeje ndaj punonjësve të policisë pas sulmeve me mjete ndezëse ndaj efektivëve.

Në Gjermani, më shumë se 100 mijë persona morën pjesë në marshimet e fushatës “Gen Z regelt” në mbi 30 qytete. Në Frankfurt, persona të maskuar dëmtuan 17 dyqane dhe grabitën pesë prej tyre, ndërsa gjatë përplasjeve u plagosën mbi 100 efektivë policie.

Përplasje dhe masa policore u regjistruan po ashtu në Zvicër (Cyrih, Bazel dhe Gjenevë), ku policia përdori topa uji e plumba gome për shpërndarjen e turmës, si dhe në Portugali, ku u shpërndanë kampet e ngritura kundër reformës së qirasë në Lisbonë dhe Porto.

Në Shqipëri, protestat e të rinjve që kërkojnë dorëheqjen e kryeministrit Edi Rama u përshkallëzuan në përplasje me Policinë e Shtetit, me përdorim molotovësh e gurësh. Sipas të dhënave të Ministrisë së Brendshme, gjatë trazirave në vend janë plagosur 350 persona (mes të cilëve 200 efektivë policie) dhe janë arrestuar 269 të mitur.