Përdorimi i miellit me nivel të ulët proteinash për prodhimin e bukës, prania e mundshme e mykotoksinave kancerogjene nga ruajtja e keqe dhe përdorimi i ngjyruesve sintetikë te buka e zezë përbëjnë disa nga shqetësimet kryesore të ngritura mbi sigurinë ushqimore në Shqipëri.

Eksperti i drithërave me një përvojë 40-vjeçare, Abdyl Sinani, ka denoncuar publikisht shkeljet me cilësinë e grurit që importohet në vend. Serbia mbetet furnizuesi kryesor, duke mbuluar mbi 60% të grurit për konsum human. Megjithatë, Sinani sqaron se problemi kryesor nuk është origjina, por përzgjedhja e tregtarëve shqiptarë për të importuar grurë më të lirë me gluten të ulët — i destinuar zakonisht për biskota e ëmbëlsira — dhe përdorimi i tij për bukë përmes shtimit të aditivëve fryrës.

Një tjetër problematikë e rëndë e nërvijëzuar nga eksperti lidhet me bukën e zezë, ku në vend të miellit natyral me krunde, disa prodhues përdorin miell të bardhë të përzier me ngjyrues për t’i dhënë pamje të errët. Sinani ngriti po ashtu alarmin për mungesën e kushteve adekuate të ruajtjes së drithërave që vijnë nga Serbia, çka favorizon krijimin e mykotoksinave me efekte kancerogjene.

Për më tepër, përpunimi i pakujdesshëm i miellit ka shkaktuar shfaqjen e "sëmundjes së patates" në disa furra në Lushnjë e Berat, ku në vend të asgjësimit të brumit të prekur, përdoret aciditet artificial për manipulimin e tij. Përmes këtij denoncimi, eksperti kërkon reagim dhe kontrolle të rrepta laboratorike nga institucionet përgjegjëse të sigurisë ushqimore në vend.