Një 19-vjeçar shqiptar është dënuar me një vit burg në Francë, pasi u kap duke transportuar 2.6 kilogramë kokainë të fshehur në një automjet që vinte nga Spanja. Rasti është raportuar nga gazeta rajonale franceze Ouest-France, citon noa.al. Kjo drogë e fortë në tregun e zi kap vlerën e të paktën 300 mijë eurove.

Ngjarja ndodhi në pikën e pagesës së autostradës në Le Bignon, në jug të Nantes, në departamentin Loire-Atlantique. Gjatë kontrollit të automjetit Renault Clio, autoritetet zbuluan sasinë e drogës të fshehur në baterinë e makinës.

Sipas raportimit të medias franceze, drejtuesi i automjetit ishte një shtetas shqiptar vetëm 19 vjeç, i cili kishte mbërritur në Francë rreth tre javë përpara ndalimit. I riu kishte pranuar një ofertë nga një rrjet trafikantësh për transportimin e lëndës narkotike.

Mënyra e fshehjes së drogës, në një pjesë të automjetit që zakonisht nuk kontrollohet lehtësisht, tregon për përpjekjen për ta kaluar ngarkesën pa u zbuluar.

«Jeta ndonjëherë na detyron të bëjmë gjëra», psherëtiu ai, nëpërmjet një përkthyesi në seancën gjyqësore ndaj tij.

Hetimi nxori se droga ishte fshehur në baterinë e Clio-s, e cila po kthehej nga Spanja të hënën, më 26 tetor. Pasi kishte mbërritur në Francë tre javë më herët, shoferi 19-vjeçar pranoi një ofertë nga një rrjet trafikimi droge për të mbështetur financiarisht nënën e tij të sëmurë.

I gjykuar në një seancë të përshpejtuar të premten, ai do të duhet të paguajë gjithashtu një gjobë prej 175,300 eurosh.

Pas procedimit gjyqësor, 19-vjeçari u dënua edhe me një vit burg. Mediat franceze nuk kanë dhënë në informacionin e disponueshëm identitetin e plotë të të riut apo hollësi të tjera për personat e dyshuar se organizuan transportin. /noa.al