Autoritetet gjermane kanë ngritur akuza ndaj dy të rinjve, 19 dhe 23 vjeç, të dyshuar se kishin diskutuar dhe planifikuar një krim të rëndë të lidhur me sigurimin e armëve të luftës. Mes tyre është edhe Adnan R., një 19-vjeçar nga Hagen, i cili ka shtetësi gjermane dhe është shqiptar i Kosovës, raporton noa.al.

Rasti u bë publik sot, pas një operacioni të forcave speciale në qytetet Hagen dhe Unna, në landin Nordrhein-Westfalen. Më 1 tetor, policia ndaloi fillimisht tre persona pas informacioneve të siguruara nga shërbimet e inteligjencës. Një person i katërt u identifikua gjatë hetimeve të mëvonshme.

Sipas njoftimit të përbashkët të Gjykatës së Hagenit, Prokurorisë së Përgjithshme në Düsseldorf dhe Policisë së Dortmundit, më 26 tetor u ngrit akuzë ndaj 23-vjeçarit Kai R. (në foto) nga Unna dhe 19-vjeçarit nga Hagen. Ata dyshohet se në shtator kishin rënë dakord për kryerjen e një sulmi terrorist.

Sipas burimeve të sigurisë që citon gazeta gjermane Tages Speiegel, kishte dyshime për lidhje ideologjike me grupin terrorist Shteti Islamik (IS). I riu shqiptaro- gjerman thuhet se është konvertuar në Islam. 19-vjeçari më pas u vu nën vëzhgimin e policisë gjatë hetimit.

Gazeta BILD raportoi se hetuesit po shqyrtonin biseda të dyshuara për një sulm të mundshëm dhe sigurimin e armëve automatike. Megjithatë, autoritetet nuk kanë konfirmuar publikisht një objektiv konkret sulmi.

Gjatë një kontrolli në banesën e 19-vjeçarit u sekuestruan pajisje elektronike, por nuk u gjetën armë. Dy persona të tjerë, shtetas sirianë të moshave 20 dhe 24 vjeç, ishin liruar nga ndalimi.

Gjykata vendosi paraburgimin e 23-vjeçarit, ndërsa për 19-vjeçarin shqiptar u zgjat me 14 ditë masa e ndalimit policor për arsye sigurie. Pranimi i aktakuzës për gjykim mbetet në kompetencën e Gjykatës së Hagenit.

Hetimet vijojnë. Asnjë nga të akuzuarit nuk është shpallur fajtor me vendim përfundimtar dhe autoritetet theksojnë prezumimin e pafajësisë. /noa.al