Britani, dënohet shqiptari 21-vjeçar për kokainë në Ipswich, përballet edhe me dëbimin nga vendi

Një 21-vjeçar shqiptar është dënuar me një vit e katër muaj burg në Britaninë e Madhe, pasi pranoi fajësinë për mbajtje të kokainës me qëllim shpërndarjen në qytetin Ipswich, në qarkun Suffolk.

Sipas gazetës lokale East Anglian Daily Times dhe të dhënave të çështjes gjyqësore, i dënuari është Qazim Shehu, 21 vjeç, i cili doli përpara Gjykatës së Ipswichit më 28 tetor 2026.

Çështja lidhet me një ngjarje të datës 8 gusht 2026, kur i riu u përfshi në një procedim penal për posedimin e kokainës me qëllim furnizimin e personave të tjerë.

Në legjislacionin britanik, kokaina konsiderohet lëndë narkotike e kategorisë A.

Gjatë shqyrtimit të çështjes, Shehu pranoi fajësinë. Vendimi u dha nga gjyqtari David Pugh, i cili vendosi dënimin me 16 muaj burg. Gjykata urdhëroi gjithashtu konfiskimin e dy telefonave celularë dhe të një shume parash të lidhura me çështjen.

Në dokumentacionin gjyqësor, mosha e re dhe mungesa e dënimeve të mëparshme penale përkatëse janë shënuar ndër rrethanat e marra në konsideratë gjatë vendimit.

Përveç burgimit, 21-vjeçari përballet edhe me dëbimin nga Britania e Madhe. Gazeta lokale raporton se atij i është bërë e ditur se nuk ka të drejtë qëndrimi në vend dhe se do të deportohet. Nuk ka ende konfirmim se dëbimi është ekzekutuar. /noa.al