TIRANË — Prania e brejtësve me përmasa të pazakonta përgjatë shtratit të lumit Lana ka ngritur shqetësime serioze mes qytetarëve lidhur me kushtet higjieno-sanitare dhe rrezikun për shëndetin publik në qendër të kryeqytetit.

Sipas dëshmive nga banorët e zonës, pranë lumit Lana janë konstatuar disa minj me përmasa shumë më të mëdha se zakonisht, sa një maçok, të cilët dalin nga vrimat përgjatë shtratit të lumit në një nga akset më të frekuentuara të Tiranës.

Situata ngre pikëpyetje mbi menaxhimin sanitar të hapësirave publike, pasi brejtësit shërbejnë si bartës të sëmundjeve të rënda infektive, si leptospiroza, ndërsa kontaminimi i sipërfaqeve përbën kërcënim të drejtpërdrejtë për kalimtarët, fëmijët dhe kafshët shtëpiake.

Ndërsa alarmi për emergjencë shëndetësore mbetet i pranishëm, qytetarët kërkojnë ndërhyrjen e menjëhershme të Bashkisë së Tiranës dhe institucioneve përgjegjëse për kryerjen e inspektimeve, dezinfektimin dhe deratizimin e plotë të të gjithë zonës përgjatë lumit Lana.