Protestat kundër rritjes së kostos së jetesës dhe shkurtimeve publike në Gjermani kanë përfunduar në incidente të dhunshme, ku grupe demonstruesish u përplasën me forcat e rendit dhe plaçkitën dyqane në disa qytete kryesore.

Përplasjet më të rënda u regjistruan në Frankfurt, ku policia përdori topa uji pasi protestuesit sulmuan efektivët dhe shërbimet e emergjencës me fishekzjarrë, gurë, shishe dhe bomba molotov. Trazira dhe ndërhyrje policore u raportuan gjithashtu në Berlin, Këln dhe Hamburg. Sipas policisë së Frankfurtit, gjatë trazirave u thyer xhamat e disa dyqaneve, përfshirë një dyqan armësh ku u arrestua një i dyshuar dhe u sekuestruan dy armë.

Tubimet u organizuan nga grupimi "Gen Z regelt" ("Gjenerata Z merr drejtimin"), me pjesëmarrjen e dhjetëra mijëra të rinjve që kundërshtojnë financimin e pamjaftueshëm të arsimit, rritjen e kostove të jetesës dhe rikthimin e shërbimit ushtarak të detyrueshëm. Zëdhënësja e lëvizjes, Lina Friedrich, theksoi se demonstratat synonin mbrojtjen e paqes dhe shpërndarjen e drejtë të barrës financiare, duke u distancuar nga dhuna.

Ministri i Brendshëm i landit të Hessenit, Roman Poseck, deklaroi se në protestën e Frankfurtit u infiltruan rreth 100 ekstremistë të majtë, duke e cilësuar dhunën si të papranueshme.

Vala e protestave rinore është përhapur gjerësisht në të gjithë Evropën. Në Francë, mbi 320 mijë persona morën pjesë në demonstrata në mbarë vendin, ku përplasjet në Tuluzë, Lion dhe Marsejë çuan në mbi 500 arrestime. Tubime masive kundër krizës së strehimit, arsimit dhe kostove të jetesës u regjistruan po ashtu në Itali, Portugali, Belgjikë, Spanjë, Greqi, Serbi dhe Shqipëri.