FIER — Një zjarr me përmasa të mëdha ka shkrumbuar tërësisht një banesë në fshatin Hoxharë e Vjetër në Fier, ndërsa i riu që ndodhej brenda ka shpëtuar pa pësuar lëndime falë ndërhyrjes së menjëhershme të banorëve të zonës.

Shkak për përhapjen e flakëve dyshohet të jetë bërë një bombol gazi që përdorej për gatim. Sipas dëshmive të fqinjëve, 33-vjeçari Redjan Llambro ka pësuar një krizë epileptike pikërisht në momentin kur po ndizte bombolën, duke e rrëzuar atë në tokë. Zjarri u përhap me shpejtësi nëpër orendi dhe pajisje, duke përfshirë të gjithë hapësirën e shtëpisë.

Kanë qenë fqinjët ata që kanë diktuar tymin dhe kanë ndërhyrë brenda pak minutave për nxjerrjen e 33-vjeçarit nga ambienti i përfshirë nga flakët. Ekipet zjarrfikëse që mbërritën më pas në vendngjarje bënë të mundur lokalizimin e vatrës, duke parandaluar djegien e banesave ngjitur.

Në banesë jetonte 33-vjeçari së bashku me nënën e tij, e cila nuk ndodhej aty gjatë incidentit. Pavarësisht se nuk pati dëme në njerëz, dëmet materiale janë të konsiderueshme, pasi familja ka humbur pothuajse të gjitha pasuritë shtëpiake.