SHKODËR — Një aksident i rëndë me pasojë vdekjen ka ndodhur pasditen e kësaj të diele në Shkodër, ku një 67-vjeçare ka humbur jetën pasi është përplasur nga një automjet që doli nga rruga.

Ngjarja u regjistrua rreth orës 15:40 në zonën e njohur si "Ura e Bahçallëkut". Sipas të dhënave paraprake nga policia lokale, automjeti drejtohej nga një 27-vjeçare, e cila dyshohet se ka humbur kontrollin mbi drejtimin e mjetit.

Pas daljes nga rruga, automjeti është përplasur fillimisht me shkallët metalike të një ndërtese dhe më pas ka goditur këmbësoren 67-vjeçare, e cila po ecte mbi trotuar. Pavarësisht ndërhyrjes, e moshuara nuk ka mundur t’u mbijetojë plagëve të marra nga përplasja e fortë.

Në vendngjarje kanë mbërritur menjëherë shërbimet e policisë dhe grupi hetimor, të cilët po kryejnë veprimet procedurale për zbardhjen e plotë të rrethanave të ngjarjes dhe përcaktimin e shkaqeve që çuan në humbjen e kontrollit të automjetit.

Shkodër/Informacion paraprak

Rreth orës 15:40, në vendin e quajtur “Ura e Bahçallëkut”, shtetasja B. P., 27 vjeçe, duke drejtuar automjetin e saj, dyshohet se ka humbur kontrollin mbi drejtimin e tij dhe si pasojë, automjeti ka dalë nga rruga dhe është përplasur me shkallët metalike të një ndërtese.

Si pasojë e aksidentit, ka humbur jetën këmbësorja, shtetasja E. B., 67 vjeçe, e cila po ecte në trotuar.

Grupi hetimor vijon punën për sqarimin e rrethanave dhe përcaktimin e shkakut të aksidentit.