KUKËS — Rënia e ndjeshme e nivelit të ujit në liqenin e Fierzës ka sjellë sërish mbi sipërfaqe rrënojat e Kukësit të Vjetër. Pavarësisht reshjeve të regjistruara ditët e fundit, situata hidrike në këtë ujëmbledhës mbetet kritike, ku niveli i ujit ka zbritur në kuotën e 260 metrave mbi nivelin e detit, ndërsa prurjet anësore kanë rënë në më pak se 45 metra kub në sekondë.

Si pasojë e kësaj rënieje drastike, hidrocentrali i Fierzës është nxjerrë përkohësisht jashtë funksionit. Kjo gjendje ka ardhur si pasojë e periudhës së zgjatur të thatësirës, mungesës së reshjeve sistematike, si dhe shfrytëzimit intensiv të rezervave ujore për prodhimin e energjisë elektrike gjatë muajve të kaluar.

Rishfaqja e rrënojave të qytetit të vjetër, ky fenomen i regjistruar për herë të dytë brenda dhjetë muajve të fundit, dëshmon shkallën e tërheqjes së ujërave në kaskadën e Drinit. Autoriteteve u mbetet të presin ecurinë e reshjeve dhe rritjen e prurjeve lumore në ditët në vijim, faktorë këta vendimtarë për rikuperimin e kuotave ujore dhe rinisjen e punës për prodhimin e energjisë në hidrocentral.