Një goditje e fortë ka tronditur piramidën drejtuese të Policisë së Serbisë, ku Drejtori i Hetimeve Kriminale, Marko Kriçak, 42 vjeç, është arrestuar nën akuzën e shpërdorimit të detyrës dhe shkeljes së detyrimeve profesionale. Kriçak, i njohur publikisht si një nga njerëzit e afërt të presidentit Aleksandar Vuçiç, u prangos së bashku me Boško Sekulović, drejtor i Shërbimit për Luftën kundër Krimit.

Sipas Prokurorisë së Lartë Publike të Beogradit, të dy zyrtarët e lartë dyshohen se kanë cenuar rëndë të drejtat e ish-shefit të policisë së kryeqytetit serb, Veselin Milić. Hetimet lidhen me një vrasje të ndodhur në maj të këtij viti në një restorant në Beograd, ngjarje pas të cilës Milić u mbajt dy muaj në paraburgim me akuzën e mosraportimit të krimit dhe strehimit të autorit. Pas lirimit, Milić ngriti padi penale ndaj dy drejtuesve të policisë, duke i akuzuar se kishin dorëzuar në prokurori prova të falsifikuara, selektive dhe të paplota për ta inkriminuar atë.

Arrestimi i Kriçakut vjen në një moment të rënduar politik në Serbi. Ai ishte bërë më parë shënjestër e kritikave të ashpra nga lëvizja studentore, e cila e akuzonte drejtpërdrejt për brutalitet policor gjatë shtypjes së protestave masive kundër qeverisë së Vuçiçit.

Kreu i Prokurorisë së Lartë Publike të Beogradit, Nenad Stefanović, deklaroi se aksioni i policisë mbështetet tërësisht mbi prova ligjore dhe nuk ka lidhje me proceset politike apo rezultatin e zgjedhjeve të parakohshme parlamentare. Ndërkohë, hetimet ndaj dy zyrtarëve po vijojnë për zbardhjen e plotë të veprimtarisë së tyre.