Një operacion i përbashkët mes Interpol Tiranës dhe Interpol Athinës ka çuar në arrestimin në Greqi të 26-vjeçarit Romarjo Tahiri, i cili ishte shpallur në kërkim ndërkombëtar për vrasje të kryer në bashkëpunim.

Sipas njoftimit zyrtar të Policisë së Shtetit, arrestimi i të riut nga Korça u realizua në kuadër të operacionit të koduar "The Wanted". Tahiri dyshohet se në vitin 2020, në qytetin e Selanikut, në bashkëpunim me dy persona të tjerë, ka dhunuar dhe më pas ka goditur me mjete prerëse shtetasin Spartak Dervishi, duke i shkaktuar vdekjen.

Ngjarja e ndodhur në Greqi u hetua nga drejtësia shqiptare pas kallëzimit të bërë nga familjarët e viktimës në Korçë, çka solli koordinimin e veprimeve hetimore me autoritetet greke. Në vitin 2021, Gjykata e Shkallës së Parë Korçë i kishte caktuar 26-vjeçarit masën e sigurisë "Arrest në burg" në mungesë për veprën penale "Vrasja me dashje", kryer në bashkëpunim.

Në bashkëpunim mes dy zyrave të Interpolit kanë nisur procedurat zyrtare për ekstradimin e Romarjo Tahirit drejt Shqipërisë, ku do të përballet me akuzat e ngritura ndaj tij.