ITALI, 31 Tetor 2026 — Një ngjarje e pazakontë dhe me prapavijë tragjike po hetohet nga drejtësia italiane, ku 76-vjeçari Elico Fantuzzi akuzohet për vrasjen e kushëririt të tij 74-vjeçar, Alfredo, përmes një ushqimi të ndaluar për gjendjen e tij shëndetësore.

Përpara gjyqtarit të hetimeve paraprake (GIP), i pandehuri zgjodhi të mos u përgjigjej pyetjeve zyrtare, por dha deklarime spontane. Alfredo, i cili vuante nga skizofrenia dhe disfagia (vështirësi e rëndë në gëlltitje), jetonte në një shtëpi kujdesi për të moshuarit. Për shkak të diagnozës, ai ndiqte një dietë strikte ku lejoheshin vetëm ushqimet lëngshme. Hetuesit pretendojnë se Elico, i cili ishte kujdestari i tij ligjor që prej vitit 2009, i kishte lënë pranë një ëmbëlsirë me krem (bombolone), çka i shkaktoi vdekjen nga bllokimi i rrugëve të frymëmarrjes.

Gjatë seancës, 76-vjeçari pretendoi se ngjarja kishte ndodhur nga pakujdesia dhe mohoi kategorikisht qëllimin kriminal:

“E doja shumë Alfredon, për mua ishte si një vëlla. I lashë ëmbëlsirën pranë dhe u largova për të biseduar me infermierët e azilit.”

Pavarësisht kërkesës së avokatit mbrojtës për lirimin e klientit apo vendosjen e detyrimit të paraqitjes, gjykata vendosi të konfirmojë masën e arrestit shtëpiak. Fantuzzi do të lejohet të komunikojë vetëm me bashkëshorten, avokatin dhe mjekët e tij.

Motivi i dyshuar dhe dëshmitë mbrojtëse

Sipas grupit hetimor, pas ngjarjes mund të fshihet një motiv financiar, pasi i ndjeri Alfredo zotëronte një pasuri të luajtshme prej mbi 300 mijë eurosh, ku Elico shfaqet si bashkëtrashëgimtar. Prokuroria pretendon gjithashtu se i pandehuri i kishte çuar edhe më parë ushqime të ngurta të moshuarit, duke u qortuar nga personeli, dhe se këtë herë mund të ketë shpërqendruar qëllimisht punonjësët e azilit.

Nga ana tjetër, pjesëtarë të familjes kanë dalë publikisht në mbrojtje të 76-vjeçarit. Për gazetën Gazzetta di Reggio, një prej mbesave të tij deklaroi në kushte anonimiteti se Fantuzzi kishte një jetë që kujdesej për të afërmit e moshuar dhe se gjesti i tij ishte nisur nga mirësia. Ajo ngriti dyshime se ngjarja mund të jetë pasojë e një gabimi nga ana e vetë personelit të azilit, i cili po tenton t’i shmanget përgjegjësisë. Hetimet e prokurorisë vazhdojnë për zbardhjen e plotë të rrethanave ligjore dhe mjekësoro-ligjore.