TIRANË, 31 Tetor 2026 — Sindikata e Gardës së Republikës i është drejtuar publikisht qeverisë dhe Ministrisë së Financave me një kërkesë urgjente për rishikimin e pagave të efektivëve të saj, menjëherë pas vendimit të ekzekutivit për rritjen e trajtimit financiar për punonjësit e Policisë së Shtetit.

Përmes një deklarate zyrtare, sindikata argumenton se trupa e Gardës po lihet në harresë financiare që prej vitit 2001. Ajo thekson se diferenca meritore prej 15 mijë lekësh që historikisht përfitonin efektivët e Gardës në raport me institucionet e tjera të sigurisë sot është shkrirë plotësisht, duke cenuar dinjitetin ekonomik të punonjësve.

Sindikata u bën thirrje strukturave përgjegjëse të financës që të dërgojnë menjëherë pranë Ministrisë së Financave programin e detajuar për rritjen e pagave, duke nënvizuar se natyra e punës së tyre mbart një shkallë të lartë rrezikshmërie dhe përgjegjësie:

“Profesioni ynë është gjithmonë me vizë të kuqe. Presioni, gatishmëria dhe vështirësia në shërbimin tonë janë maksimale në çdo sekondë. Zero tolerancë për gabime: në profesionin tonë nuk ka kurrë ‘herë të parë’ kur bëhet fjalë për cenimin apo rrezikimin e Personaliteteve të Larta Shtetërore, vendas apo të huaj. Të mbrosh shtetin me jetë kërkon që edhe shteti të të vlerësojë me dinjitet.”

Në përfundim të reagimit, Sindikata e Gardës së Republikës kërkon reflektim të menjëhershëm nga autoritetet shtetërore, me qëllim që efektivët e këtij institucioni të përfshihen në skemën e re të rritjes së pagave në përputhje me rëndësinë dhe specifikën e shërbimit të tyre.

Reagimi

Kujtesë

Struktura e Gardës së Republikës nuk mund të lihet në "harresë" financiare!

Në vijim të postimit tonë zyrtar të mëparshme; “Thirrjen për dialog në rritjen e pagës”, i rikujtojmë Sektorit të Financës dhe strukturave përgjegjëse të paraqesin urgjentisht pranë “Ministrisë së Financës” programin e rritjes së pagave për punonjësit e Gardës të detajuara.

Nuk mund të pritet më! Që nga viti 2001, Institucioni i Gardës së Republikës nuk vlerësohet siç duhet. Ajo që historikisht ka qenë një diferencë meritore prej +15,000 lekësh ndaj institucioneve tjera të sigurisë sot është shkrirë, duke cenuar dinjitetin ekonomik të punonjësve tanë.

Pse kjo rritje është e padiskutueshme?

–Profesioni ynë është gjithmonë me "vizë të kuqe": Presioni, gatishmëria dhe vështirësia në shërbimin tonë janë maksimale në çdo sekondë.

Zero tolerancë për gabime: Në profesionin tonë nuk duhet dhe nuk ka kurrë "herë të parë" kur bëhet fjalë për cenimin apo rrezikimin e Personaliteteve të Lara Shtetërore, vendas apo të huaj. Siguria e tyre është imazhi i vetë shtetit shqiptar. Të mbrosh shtetin me jetë kërkon që edhe shteti të të vlerësojë me dinjitet. Presim reflektim dhe hapa konkretë nga strukturat përgjegjëse.