Në Tiranë po zhvillohen këtë të shtunë, 31 tetor, dy protesta kombëtare: njëra e organizuar nga studentët, pedagogët dhe të rinjtë para Ministrisë së Arsimit, dhe tjetra e thirrur nga Partia Demokratike para Kryeministrisë

Tiranë – Studentët që janë sot në ditën e 19-të protestës së tyre, nuk po lejojnë bashkimin e protestuesve të PD-së në tubimin para Ministrisë së Arsimit.

Siç shihni pamjet që ju sjell noa.al, demokratët e opozitës u pritën me thirrjet "Rama në burg, Berisha në burg".

Të rinj e të reja që janë pjesë e lëvizjes studentore nuk po lejojnë që demokratët tu bashkohen dhe u bënë thirrje të largohen.

Ky zhvillim vjen ndërsa sot në Tiranë po zhvillohen dy protesta kombëtare: njëra e organizuar nga studentët, pedagogët dhe gjimnazistët që e kishin pikënisjen para Ministrisë së Arsimit, dhe tjetra e thirrur nga Partia Demokratike para Kryeministrisë.

Sapo protestuesit e udhëhequr nga deputetët e opozitës kanë mbërritur në hyrje të Rrugës së Durrësit, janë pritur me thirrjet “Rama në burg, Berisha në burg”.

Në këto minuta ka pasur edhe përplasje me një protestues, i cili ka kërkuar që të largoheshin deputetët e opozitës.

Me thirrjet: “Si u shite gjithë këto vite, Partia Demokratike?” dhe “Opozita jemi ne”, studentët iu drejtuan deputetëve të opozitës.