TIRANË — Bursat kryesore evropiane e kanë mbyllur seancën e fundit të tregtimit me rezultate të miksuara, ku një pjesë e indekseve pësuan rënie ndërsa të tjerat shënuan rritje të lehta, nën ndikimin e drejtpërdrejtë të rritjes së çmimit të naftës dhe pasigurive lidhur me kthimin e fitimeve nga investimet në inteligjencën artificiale.

Tregjet financiare pësuan goditje edhe pas publikimit të rezultateve më të dobëta se parashikimet nga gjigantët teknologjikë si “Amazon” dhe “Intel”. Ndërkohë, çmimi i naftës së llojit “Brent” u rrit me rreth 3%, duke kaluar kuotën e 114 dollarëve për fuçi, çka ka thelluar shqetësimet e investitorëve për rritjen e inflacionit dhe ngadalësimin e rritjes ekonomike në nivel global.

Në mbyllje të tregtimit, indeksi kryesor evropian “Stoxx 600” ra me 0,36%, ndërsa indeksi gjerman DAX humbi 0,85%. Në Francë, indeksi “CAC 40” mbeti pothuajse i pandryshuar, kurse në Britaninë e Madhe “FTSE 100” shënoi një rritje të lehtë prej 0,07%. Zhvillimet ekonomike treguan se ekonomia gjermane u rrit me 0,2% në tremujorin e tretë, ndërsa ajo franceze pësoi një rënie prej 0,1%, me inflacionin në Francë që arriti në 3,4% në tetor.

Në sektorin bankar britanik u regjistruan humbje të ndjeshme, me aksionet e bankës “NatWest” që ra me gati 9% për shkak të uljes së fitimeve, e ndjekur nga rënie edhe te “Lloyds” dhe “Barclays”. Në krahun tjetër, performancë pozitive shënuan kompanitë farmaceutike si “AstraZeneca” me një rritje prej 7% dhe “Sanofi” me 5%, si dhe kompania e naftës “BP” dhe prodhuesi i veshjeve sportive “Puma”, pas raportimit të fitimeve më të larta se parashikimet e tregut.