TIRANË, 30 Tetor 2026 — Kryetari i Partisë Demokratike, Sali Berisha, ka komentuar mundësinë e një takimi me ambasadorin e ri të Shteteve të Bashkuara të Amerikës në Shqipëri, Eric Wendt, si dhe marrëdhëniet e tij me diplomacinë amerikane.

I ftuar në emisionin “Çdo Kënd” në A2 CNN, i pyetur se kur parashikon të zhvillojë një takim me kryediplomatin e ri amerikan, Berisha u përgjigj shkurt: “Duhet të pyesni ambasadorin amerikan, jo mua”.

Gjatë bisedës, kreu i opozitës u ndal edhe te çështja e maseve shtetërore amerikane ndaj tij, verifikimet e pasurisë dhe hetimet ndaj rrethit të tij familjar:

"Duhet të pyesni ambasadorin amerikan, jo mua. Unë nuk kam patur asnjë sanksion tjetër përveç vizës. Ka ligje të tjera që parashikojnë gjëra të tjera. Në atë kohë, u dërgua në Thesar kërkesa, pa asnjë bazë, për verifikim pasurie. Thesari tha që nuk ka asnjë motiv për sanksione ndaj Sali Berishës. Mua më bënë nder pasi u bë një vetting dhe unë jam i vetmi politikan në Europë me dy vetting. Vetting të plotë deri te nipërit e mi para lindjes. Zero u gjet. U gjet se dhëndrri im dhe vajza ime kanë sponsorizuar 3 familje me fëmijë me autizëm në qendrën ku bashkëshortja ime punon prej 20 vitesh pa asnjë lloj shpërblimi. Kanë arritur deri aty, sikur të ishin nazistë, që të publikojnë emrat e fëmijëve autikë, duke traumatizuar familjet. Kështu që, unë u them studentëve që të mos presin kurrë zgjidhje nga individë të korruptuar."

Berisha këmbënguli se verifikimet e kryera ndaj pasurisë së tij dhe familjarëve nuk kanë konstatuar asnjë shkelje apo parregullsi ligjore, duke i cilësuar pretendimet ndaj tij si të pabazuara.