TIRANË, 30 Tetor 2026 — Kryetari i Partisë Demokratike, Sali Berisha, ka deklaruar se në rast të një fitoreje të opozitës në zgjedhjet e ardhshme, ai nuk do të marrë automatikisht postin e kryeministrit. I ftuar në emisionin “Çdo Kënd” me gazetaren Merita Haklaj në A2 CNN, Berisha bëri me dije se emri i shefit të ardhshëm të ekzekutivit do t’i nënshtrohet një votimi të posaçëm popullor përmes referendumit.

Gjatë intervistës, kreu i opozitës shpjegoi mekanizmin e propozuar prej tij, besimin te zmbrapsja e mazhorancës pa praninë e kryeministrit aktual, si dhe domosdoshmërinë e kufizimit të mandateve qeverisëse:

“Një gjë kam deklaruar se unë kryeministër nuk bëhem pse fitoj zgjedhjet. Jo. Bëhem kryeministër me referendum. Po fitova zgjedhjet do votojnë edhe njëherë shqiptarët për kryeministrin. Kushtetuta nuk e pengon se ti u jep mundësi me 3-4 kandidatura me referendum popullor. Absolutisht asnjë ambicie, por respekt. Se nëse ti udhëheq fushatën dhe fiton të gjitha ato që u ke thënë qytetarëve ata kanë të drejtë. Atëherë del problemi që ata duhet të vendosin veças për kandidaturat e kryeministrit.”

Po ashtu, Berisha u shpreh i bindur për një fitore të menjëhershme të opozitës në kushtet e një gare pa praninë e kreut të qeverisë:

“Në kushte të lira, sot opozita fiton zgjedhjet nëse zgjedhjet bëhen brenda një muaji pa Edi Ramën.”

Në përmbyllje të fjalës së tij, kreu i PD-së rikonfirmoi qëndrimin e tij për kufizimin e mandatit të kryeministrit në vetëm dy periudha qeverisëse. Ai argumentoi se ndërsa në periudhën 1990–2013 në Shqipëri u realizuan katër rrotacione politike, që nga viti 2013 procesi i rrotacionit është bllokuar si pasojë e ndikimit të krimit të organizuar dhe pushtetit të Edi Ramës.