TIRANË, 30 Tetor 2026 — Kryetari i Partisë Demokratike, Sali Berisha, ka sqaruar pozicionin e opozitës lidhur me valën e protestave studentore dhe qytetare që po zhvillohen në vend. I ftuar në emisionin "Çdo Kënd" me gazetaren Merita Haklaj në A2 CNN, Berisha deklaroi se Partia Demokratike i mbështet këto reagime që nga dita e tyre e parë, por mohoi se partia e tij është organizatorja zyrtare e tyre.

Në fjalën e tij, kreu i opozitës u ndal te origjina e lëvizjes studentore, pjesëmarrja e anëtarësisë demokratike pa simbole partiake dhe reagimi i ekzekutivit:

“Partia Demokratike është në protestë që në datën 1 qershor, por dua të sqaroj një gjë. Vera që kaloi u karakterizua nga protesta më e madhe qytetare në historinë e vendit. Në këto rrethana, partia e protestës, nëna e protestës në Shqipëri, u përshtat dhe respektoi karakterin qytetar. Morën pjesë me qindra mijëra anëtarë të PD-së çdo natë, pa simbolet e saj.

Vendosi të respektonte frymën dhe karakterin qytetar. Sa i përket protestës së studentëve, po përpiqen shumë për autorësi, por e vërteta është se protesta u thirr nga Sindikata e Universiteteve, më 13 tetor, te Ministria e Arsimit. Analizat e rreme janë të neveritshme. Thirrjes për protestë iu përgjigj Forumi Rinor i Partisë Demokratike, dega e universiteteve. Kështu që, në datën 13 në protestë ishin me qindra anëtarë të strukturave të PD-së, por edhe grupe pa lidhje me Forumin.

Edi Rama u hodh kafshërisht mbi ta dhe mendoi se duke i shtypur egërsisht ditën e parë, do të shuhej zëri i tyre. Përkundrazi, ata thirrën sërish protestë. Ne jemi në mbështetje të revoltës studentore dhe në mbrojtje të tyre”

Berisha saktësoi se strukturat rinore të PD-së në universitete dhe gjimnaze i janë përgjigjur thirrjes fillestare të Sindikatës së Universiteteve dhe se i gjithë spektri i partive aleate opozitare është rreshtuar në mbështetje të kësaj revolte.