TIRANË, 30 Tetor 2026 — Kryetari i Partisë Demokratike, Sali Berisha, e ka cilësuar vendimin për përjashtimin e tij me 10 ditë nga punimet e Kuvendit si një masë antikushtetuese që cenon lirinë e shprehjes së deputetit.

Gjatë një interviste në emisionin "Çdo Kënd" në A2 CNN, Berisha sulmoi ashpër kryeministrin Edi Rama dhe mazhorancën parlamentare, duke deklaruar:

“Ky është një përjashtim në kundërshtim me parimet themelore të kushtetutës së Shqipërisë për deklaratën time për të cilën deputeti është i lirë të shprehë në Kuvend. Ky përjashtim shpreh mendësi prej trashëgimie të Edvin Kristaq Xhelati, i cili nuk toleron asnjë lloj kundërshtimi apo sulmi mediatik. Pse më përjashtoi se unë u thashë që ata deputetë që votojnë Ramën dhe ligjet e tij e meritojnë të gjithë atë dhunë, terror e torturë që falangat e tij ushtrojnë ndaj studentëve paqësorë në revoltën e tyre. Ai parlament është i krimit në atë parlament ka kriminelë më të mëdhenj se ata që janë në burgjet e Shqipërisë të llojit të Ballës dhe Ramës që janë më të mëdhenj se gjithë bosat e karteleve të lidhur me ta. Në atë parlament ka kriminelë dhe shumë se ata që janë në burg. Që nga koha e PPSH nuk ka ekziston një grup kriminal me mandat sesa ekziston sot. I kam thënë me vetëdijen më të plotë dhe mund ta faktoj para shqiptare se çfarë kriminelësh janë këta.”

Kreu i opozitës këmbënguli se fjalori dhe qëndrimet e mbajtura prej tij në sallën e parlamentit janë të vetëdijshme dhe pasqyrojnë sipas tij praninë e elementëve kriminalë brenda grupit parlamentar të mazhorancës.