Presidenti i Republikës, Bajram Begaj, ka dekretuar datën 9 maj 2027 për zhvillimin e zgjedhjeve për organet e qeverisjes vendore në Shqipëri.

Vendimi është marrë këtë të premte, pas konsultimeve të zhvilluara me përfaqësuesit e partive politike parlamentare dhe Komisionerin Shtetëror të Zgjedhjeve.

Sipas njoftimit të Presidencës, në konsultimet e thirrura nga kreu i shtetit morën pjesë përfaqësuesit e Grupit Parlamentar të Partisë Socialiste, Partisë Socialdemokrate dhe Komisioneri Shtetëror i Zgjedhjeve. Ndërkohë, subjektet e tjera politike, përfshirë partitë opozitare, nuk iu përgjigjën ftesës dhe nuk shprehën një preferencë për datën e votimit.

Gjatë konsultimeve, Komisioneri Shtetëror i Zgjedhjeve propozoi 9 majin 2027, duke argumentuar se caktimi i kësaj date do t’u japë institucioneve më shumë kohë për përgatitjen dhe organizimin e procesit zgjedhor. Të njëjtën datë parapëlqeu edhe Partia Socialdemokrate.

Në bazë të Kodit Zgjedhor, zgjedhjet vendore duhet të zhvillohen brenda periudhës zgjedhore të pranverës, e cila përfshin katër të diela ndërmjet datave 15 prill dhe 15 maj.

Në njoftimin zyrtar, Presidenca thekson se data e zgjedhur nuk lidhet me ndonjë favorizim të palëve politike dhe nuk krijon ndikim potencialisht të dëmshëm mbi vullnetin e lirë të zgjedhësve.

Me dekretimin e datës 9 maj 2027, nis edhe rrugëtimi drejt zgjedhjeve të ardhshme vendore, në të cilat qytetarët shqiptarë do të votojnë për përfaqësuesit e tyre në drejtimin e pushtetit lokal.

Në përfundim, Presidenti Begaj u ka bërë thirrje subjekteve politike të marrin pjesë në garë me kandidatë dhe platforma konkrete, duke kërkuar një proces konkurrues, të drejtë dhe në përputhje me standardet demokratike.

Njoftimi i Presidencës

Sot, Presidenti i Republikës dekretoi datën 9 maj 2027 për zhvillimin e zgjedhjeve për organet e qeverisjes vendore.

Sipas Kodit Zgjedhor, zgjedhjet duhet të zhvillohen brenda periudhës zgjedhore të pranverës, e cila përfshin katër të diela midis datës 15 prill dhe 15 maj.

Për caktimin e datës së zgjedhjeve, Presidenti i Republikës thirri në konsultë gjithë faktorin politik që përfaqësohet në Kuvendin e Shqipërisë dhe Komisionerin Shtetëror të Zgjedhjeve si përfaqësues i organit përgjegjës për zgjedhjet në Shqipëri. Thirrjes në konsultë iu përgjigj Grupi Parlamentar i Partisë Socialiste, Partia Socialdemokrate dhe Komisioneri Shtetëror i Zgjedhjeve. Subjektet e tjera preferuan t’i qëndrojnë larg konsultës, sikurse nuk bënë publik asnjë parapëlqim partiak lidhur me datën e zgjedhjeve.

Subjektet e përfshira në konsultë u treguan të hapur për secilën zgjidhje. Komisioneri sugjeroi datën 9 maj 2027, ditën e fundit të kalendarit, me arsyetimin se kjo datë jep më shumë kohë për masat zbatuese. Partia Socialdemokrate gjithashtu parapëlqen këtë datë.

Data 9 maj 2027 nuk është e lidhur me asnjë rezervë apo paragjykim për favorizim të palëve të caktuara apo për ndikim potencialisht të dëmshëm në vullnetin e lirë dhe të pandikuar të zgjedhësve.

Në këto kushte, Presidenti i Republikës i dha forcë juridike datës 9 maj 2027.

Me këtë rast, Presidenti i Republikës fton subjektet politike të marrin pjesë në zgjedhje me alternativa, platforma dhe kandidatë në lartësinë e këtij procesi themelor demokratik; palët të zhvillojnë një proces konkurrues të drejtë, të përkushtuar e luajal, të respektojnë me vetëdije të spikatur kuadrin ligjor dhe barazinë e armëve, si dhe të bashkëpunojnë pa rezerva me KQZ-në për zhvillimin e një procesi shembullor dhe në përputhje me standardet më të larta për një shoqëri demokratike.