Rreth 5 mijë kamera trupi kanë mbërritur në Shqipëri dhe pritet të shpërndahen në të gjitha drejtoritë vendore të Policisë së Shtetit. Procesi i pajisjes së efektivëve do të nisë fillimisht në Tiranë dhe më pas do të shtrihet në të gjithë vendin.

Përfituesit e parë të pajisjeve të reja do të jenë efektivët e Policisë Rrugore, të cilët do t’i mbajnë kamerat gjatë gjithë kohës së shërbimit. Në një fazë të dytë, përdorimi i tyre pritet të përfshijë edhe strukturat e tjera të Policisë së Shtetit.

Risi e këtij sistemi është monitorimi i drejtpërdrejtë nga Sallat Operative të Policisë. Kamerat do të mund të aktivizohen dhe të kontrollohen nga salla përkatëse, duke garantuar që efektivët të mos kenë mundësi të ndërhyjnë në regjistrimin e pamjeve.

Përmes këtij mekanizmi synohet të sigurohet dokumentimi i veprimeve policore gjatë shërbimit, si dhe të rritet transparenca dhe kontrolli mbi ndërhyrjet e uniformave blu.

Shpërndarja e rreth 5 mijë kamerave pritet të sjellë një ndryshim në mënyrën e monitorimit të punës së efektivëve në terren, duke krijuar një sistem më të centralizuar të mbikëqyrjes së veprimtarisë policore.