TIRANË — Partia Socialdemokrate e Tom Doshit i ka propozuar Presidentit të Republikës, Bajram Begaj, datën 9 maj 2027 për zhvillimin e zgjedhjeve të ardhshme vendore, gjatë takimit zyrtar të mbajtur këtë të premte në Presidencë.

Përfaqësuesi i PSD-së ishte zyrtari i dytë politik që mori pjesë në konsultime, pas kreut të grupit parlamentar të Partisë Socialiste, Taulant Balla, i cili më herët u shpreh i hapur për çdo datë brenda kalendarit kushtetues, me përjashtim të 2 majit.

Ndërkohë, forcat kryesore të opozitës kanë bojkotuar procesin e konsultimeve me kreun e shtetit.

Pas Partisë Demokratike, edhe Partia e Lirisë refuzoi ftesën e Presidentit, ku sekretari i përgjithshëm Tedi Blushi deklaroi se kjo forcë politike nuk do të bëhet pjesë e takimeve.

Më herët, kreu i grupit të PD-së, Gazment Bardhi, e cilësoi ftesën e Presidencës si një “teatër politik”.

Sipas përcaktimeve të Kodit Zgjedhor, zgjedhjet vendore duhet të zhvillohen ditën e diel në periudhën mes 15 prillit dhe 15 majit, ndërsa afati i fundit që Presidenti Begaj ka në dispozicion për dekretimin e datës zyrtare është 6 nëntori.