TIRANË — Diplomati, ish-deputeti dhe publicisti i njohur Bashkim Zeneli është ndarë nga jeta këtë të premte në moshën 78-vjeçare, gjatë trajtimit mjekësor në një spital jashtë vendit.

Zeneli ka pasur një karrierë të pasur publike si gazetar, deputet i Kuvendit të Shqipërisë dhe ambasador i vendit në Gjermani dhe Greqi. Si një nga intelektualët e hershëm të Partisë Socialiste, ai dha një kontribut të çmuar në zhvillimin e jetës politike, institucionale dhe diplomacisë shqiptare.

Për veprimtarinë e tij të spikatur në politikën e jashtme, mbrojtjen e çështjes kombëtare dhe integrimin euroatlantik, në vitin 2018 ai u dekorua me titullin e lartë “Mjeshtër i Madh”. Përmes botimeve dhe librave të tij me kujtime, Zeneli ka lënë dëshmi të rëndësishme dokumentare për historinë e diplomacisë bashkëkohore shqiptare.