LONDËR — Bursa më e madhe e kriptomonedhave në botë, Binance, ka rënë viktimë e një sulmi të madh kibernetik që ka prekur rreth 6.3 miliardë dollarë (5.5 miliardë euro) në asete, duke shënuar ngjarjen më të rëndë të këtij lloji në historinë e industrisë dixhitale.

Ndikimi i goditjes kalon me katër herë sulmin më të madh të regjistruar deri më sot, atë ndaj platformës Bybit prej 1.5 miliardë dollarësh në shkurt të vitit të kaluar. Sipas njoftimit zyrtar të kompanisë, hetimeve fillestare u rezulton se sulmi ka ndodhur përmes komprometimit të laptopit të një inxhinieri DevOps, çka u ka mundësuar hakerëve ekzekutimin e tërheqjeve të paautorizuara.

Kompania konfirmoi pezullimin e përkohshëm të të gjitha depozitave dhe tërheqjeve, ndërsa garantoi se fondet e përdoruesve do të mbulohen plotësisht. Përmes një bashkëpunimi me partnerët e inteligjencës blockchain dhe emetuesit e monedhave dixhitale, deri tani janë ngrirë rreth 3 miliardë dollarë nga fondet e prekuara, përfshirë 1.6 miliardë dollarë në USDT nga kompania Tether dhe mbi 800 milionë dollarë në USDC nga Circle.

Lajmi për hakimin nxiti rënie të menjëhershme të çmimeve në bursat ndërkombëtare, ku Bitcoin dhe Ethereum pësuan rënie fillestare deri në 6 për qind përpara një rikuperimi të lehtë, ndërsa monedha vendase BNB shënoi një luhatje të fortë. Sulmi ka rindezur shqetësimet e ekspertëve mbi cenueshmërinë e protokolleve të sigurisë dhe përdorimin e inteligjencës artificiale në operacionet kibernetike.