VORË — Policia e Shtetit ka arrestuar 41-vjeçarin Elton Andreica (i njohur edhe me mbiemrin Muça), personazh me precedentë të theksuar penalë, pasi u kap në lëvizje me armë zjarri pa leje.

Gjatë momentit të ndalimit nga forcat e rendit, 41-vjeçari ka bërë rezistencë fizike dhe ka kundërshtuar efektivët e policisë që ishin vënë në ndjekje të tij. Ndërkohë, gjatë kontrollit të ushtruar në banesën e tij, shërbimet e policisë gjetën dhe konfiskuan edhe një jelek antiplumb.

Elton Andreica është i dënuar më parë për veprat penale “Vjedhje me dhunë”, “Vjedhje me armë” dhe “Armëmbajtje pa leje”, ndërsa njihet edhe për përplasje e kundërshtim të forcave të rendit gjatë aksioneve të mëparshme të arrestimit.

Grupi hetimor ka ngritur dyshime se i arrestuari është i përfshirë në veprimtari të tjera të paligjshme kriminale, me hetimet që po zgjerohen posaçërisht mbi dyshimet për tregtim të paligjshëm të armëve të zjarrit.