Qeveria përgatit sistem të ri taksimi për influencerët dhe ekonominë digjitale: Sfidat e kontrollit fiskal mbi mediat sociale

Të ardhurat e gjeneruara përmes rrjeteve sociale, përmbajtjeve të sponsorizuara dhe tregtisë online pritet të përfshihen në një nismë të re fiskale të qeverisë. Kryeministri Edi Rama paralajmëroi ngritjen e një sistemi të posaçëm taksimi për ekonominë digjitale, duke synuar formalizimin e të ardhurave të krijuesve të përmbajtjes, influencerëve dhe tregtisë elektronike.

Gjatë një deklarate më 28 tetor, kryeministri tha se ka ardhur koha për kontroll mbi personat që gjenerojnë të ardhura të konsiderueshme përmes platformave digjitale.

Nisma vjen pasi verifikimet e administratës tatimore gjatë vitit 2025 në bashkëpunim me sistemin bankar evidentuan mbi 33 milionë euro të ardhura nga platformat ndërkombëtare si Meta, Google, YouTube dhe TikTok.

Sidoqoftë, ekspertët vlerësojnë se shifra reale mbetet më e lartë për shkak të transaksioneve joformale.

Përputhshmëria me kuadrin ekzistues tatimor dhe sfidat kryesore teknike e ligjore përmblidhen si më poshtë:

Kuadri tatimor aktual

Legjislacioni shqiptar nuk përkufizon një kategori të veçantë si "influencer". Individët dhe bizneset e vogla me xhiro bruto vjetore deri në 14 milionë lekë përfitojnë nga tatim-fitimi 0% deri në dhjetor 2029, ndërsa pragu i hyrjes në skemën e TVSH-së është ulur në 5 milionë lekë me paketën e re fiskale 2027.

Gjurmimi i transaksioneve

Pagesat që vijnë nga platformat ndërkombëtare, komisionet nga shitjet, cash-i në dorë apo përfitimet jo-monetare (produkte dhe shërbime falas në këmbim të reklamës) përbëjnë një nga vështirësitë kryesore për kontrollin administrativ.

Dallimi i përmbajtjes tregtare

Ekspertët e sigurisë kibernetike theksojnë se mbetet komplekse provueshmëria ligjore nëse një postim përfaqëson një përvojë personale apo një reklamë të paguar joformalisht, pa u kthyer kontrolli fiskal në një monitorim të jetës private.

Mungesa e një mekanizmi konkret të publikuar e lë nismën në fazën e deklaratave politike, ndërsa vështirësia për identifikimin e reklamave të fshehura mbetet një sfidë globale: Kështu, referuar kontrolleve të Komisionit Evropian në vitin 2024, ku vetëm 20% e influencerëve të verifikuar e deklaronin sistematikisht përmbajtjen e paguar.