Bashkia e Shkodrës parashikohet të bëhet destinacioni kryesor për grumbullimin e mbetjeve urbane të 21 bashkive të Shqipërisë, sipas planifikimeve të përfshira në projektbuxhetin e vitit 2027.

Së bashku, këto bashki mbulojnë 34.4% të njësive administrative të vendit dhe shtrihen në rreth 33.5% të territorit kombëtar.

Gjeografia e zonës së re të menaxhimit përfshin jo vetëm njësitë e veriut, si Shkodra, Malësia e Madhe, Vau i Dejës, Puka, Fushë-Arrëzi, Lezha dhe Kurbini, por edhe bashki nga Qarku i Elbasanit dhe ai i Fierit, midis të cilave Librazhdi, Përrenjasi, Gramshi, Fieri, Lushnja dhe Mallakastra.

Kjo distancë e madhe gjeografike ngre shqetësime për kosto të larta financiare dhe logjistike gjatë transportit, për shkak të rrugëve të gjata dhe trafikut të rënduar.

Për mbulimin e shpenzimeve, buxheti i shtetit do t’u akordojë bashkive përkatëse fonde shtesë përmes transfertës së pakushtëzuar sektoriale, duke u bazuar në sasinë vjetore të mbetjeve dhe largësinë nga pika e re e depozitimit.

Ndërkohë, plani i menaxhimit të mbetjeve përcakton gjithashtu zonën e Tiranës për gjashtë bashki, atë të Korçës për gjashtë të tjera, si dhe zonën e Gjirokastrës për dhjetë bashki të rajonit jugor.