Cristiano Ronaldo ka falënderuar tifozët në mbarë botën pasi u shpall fitues i çmimit BOAT (Best Ballon d’Or of All Time), për paraqitjet e tij gjatë vitit 2008.

Ylli portugez reagoi përmes një postimi në Instagram, ku vlerësoi mbështetjen e tifozëve dhe ua dedikoi atyre këtë çmim.

“Futbolli u përket tifozëve! Faleminderit të gjithë tifozëve anembanë botës. Topi i Artë i të gjitha kohërave është edhe i juaji”, shkroi Ronaldo.

Çmimi u përcaktua përmes votave të më shumë se 5 mijë personave, duke vlerësuar sezonin e vitit 2008 të portugezit, kur ai shkëlqeu me fanellën e Manchester United.

Ronaldo e përfundoi atë vit me fitimin e Topit të Artë, pasi pati një sezon të jashtëzakonshëm, duke ndihmuar Manchester United të fitonte Ligën e Kampionëve dhe Premier League.

Me këtë reagim, portugezi theksoi edhe një herë rëndësinë e tifozëve në karrierën e tij dhe rolin që ata luajnë në sukseset e futbollit.