TIRANË – Akrobatja shqiptare Fiona Rushiti ka hyrë në librin e rekordeve Guinness, pasi realizoi 72 rrotullime të plota 360 gradë brenda 30 sekondave, duke qëndruar e varur vetëm nga dhëmbët.

Sfida u realizua më 11 qershor 2026, në Tiranë, ndërsa arritja e saj u konfirmua zyrtarisht nga Guinness World Records.

Me këtë rezultat, Rushiti theu rekordin e mëparshëm botëror, të vendosur në vitin 2025 nga një akrobat sirian, i cili kishte realizuar 65 rrotullime në të njëjtën kohë. Akrobatja shqiptare e përmirësoi rekordin me shtatë rrotullime, duke shënuar një arritje të veçantë në karrierën e saj.

Për të arritur këtë rezultat, Fiona iu nënshtrua një procesi të vazhdueshëm përgatitjeje. Në përpjekjet e para kishte realizuar 58 rrotullime, por përmes stërvitjes arriti të përmirësonte performancën deri në 72 rrotullime brenda 30 sekondave.

Kjo arritje e vendos emrin e akrobates shqiptare në regjistrin e rekordeve botërore, duke shënuar një sukses të rëndësishëm për të dhe për Shqipërinë në fushën e akrobacisë.