TIRANË, 29 Tetor 2026 — Ministri për Evropën dhe Punët e Jashtme i Shqipërisë, Ferit Hoxha, ka reaguar përmes një mesazhi zyrta r në rrjetin social X pas rrëzimit tragjik të një helikopteri ushtarak të misionit të EUFOR-it pranë qytetit të Brçkos në Bosnje-Hercegovinë, ngjarje kjo që i mori jetën tre personave dhe la të plagosur 12 të tjerë.

Kryediplomati shqiptar shprehu ngushëllimet më të sinqerta për familjarët e viktimave, si dhe për qeverinë dhe popullin e Italisë, ndërsa u uroi shërim të shpejtë ushtarakëve të lënduar nga ky aksident ajror. Hoxha theksoi se në këtë moment të vështirë Shqipëria qëndron fuqimisht krah Italisë si aleate e afërt në NATO dhe krah gjithë komunitetit të EUFOR-it, ku trupat shqiptare shërbejnë krah për krah me kolegët italianë për garantimin e paqes dhe stabilitetit në rajon.

Ministri për Evropën dhe Punët e Jashtme, Ferit Hoxha, postim në X:

Thellësisht i trishtuar nga ngjarja tragjike pranë Brçkos, në Bosnje-Hercegovinë, ku u përfshi një helikopter i EUFOR-it; ngjarje e cila mori tri jetë dhe la dymbëdhjetë persona të lënduar.

Shprehim ngushëllimet tona të sinqerta për familjet e viktimave, si dhe për Qeverinë dhe popullin e Italisë. Mendimet tona janë gjithashtu pranë të gjithë të lënduarve, të cilëve u urojmë shërim të shpejtë dhe të plotë.

Në këtë moment të vështirë, Shqipëria qëndron fuqimisht krah Italisë, vendit mik dhe aleat në NATO, si dhe në krah të gjithë komunitetit të EUFOR-it, ku personeli shqiptar shërben me krenari përkrah kolegëve italianë dhe ushtarakëve të tjerë, në një angazhim të përbashkët për paqen dhe stabilitetin në Bosnje-Hercegovinë.