RAGUSA / KATANIA, 29 Tetor 2026 — Një vajzë e mitur me origjinë shqiptare, e cila jeton në provincën e Raguzës në Itali, është vendosur nën masën e kujdesit në një komunitet, pas dyshimeve të forta për radikalizim dhe përhapje të përmbajtjeve me karakter xhihadist e ekstremist në rrjetet sociale.

Sipas autoriteteve italiane, e mitura dyshohet se publikonte në platformën TikTok materiale propagandistike në mbështetje të organizatës terroriste ISIS, simbolika ekstremiste dhe mesazhe me përmbajtje antisemitiste. Aktiviteti i saj në internet ra në rrjetën e shërbimit italian të sigurisë së brendshme (AISI), i cili njoftoi menjëherë organet e drejtësisë. Hetimet u intensifikuan pas sekuestrimit të telefonit të saj celular në muajin maj, ku analiza e pajisjes nga Policia e Shtetit zbuloi materiale të lidhura me propagandën e Shtetit Islamik, simbolika të ekstremit të djathtë, si dhe imazhe të krijuara me inteligjencë artificiale.

Gjatë hetimeve të thelluara, autoritetet zbuluan se e mitura kishte kontakte online me persona që paraqiteshin si anëtarë të ISIS-it dhe përdorues që promovonin akte terroriste. Në telefonin e saj u gjetën video propagandistike ekzekutimesh, materiale në mbështetje të organizatës terroriste, si dhe udhëzime praktike për vetëtrajnim dhe prodhimin e eksplozivëve artizanalë. Hetimet përfshinë edhe mjedisin e saj shkollor, ku u raportua se vajza kishte ndryshuar sjellje dhe kishte izoluar veten nga bashkëmoshatarët. Masat e sigurisë u lëshuan nga Prokuroria për të Miturit në Katania dhe u ekzekutuan nga njësia antiterrorizëm Digos, ndërsa e mitura akuzohet për vetëstërvitje me qëllime terroriste ndërsa çështja mbetet nën hetim gjyqësor.