Këshilli Prokurorial i Kosovës (KPK) ka vendosur të pezullojë nga detyra kryeprokuroren e Prokurorisë Themelore në Pejë, Lumturije Vuçetaj, si dhe prokuroren e çështjes, Arlinda Nallbani Gacaferri, pas dyshimeve për mosveprim në rastin e vrasjes së Arlinda Zekajt.

Vendimi u mor të enjten, në një mbledhje të jashtëzakonshme të KPK-së, ku pezullimi i dy prokuroreve u miratua me shtatë vota pro.

Më herët, kryeprokurori i Shtetit, Zejnullah Gashi, kishte rekomanduar pezullimin e tyre dhe kishte njoftuar për nisjen e procedurës disiplinore lidhur me trajtimin e rastit.

Po ashtu, KPK-ja ka themeluar një grup hetimor për të shqyrtuar rrethanat e çështjes dhe përgjegjësitë eventuale të personave të përfshirë.

Arlinda kërkoi ndihmë tri ditë para vrasjes

Masat ndaj dy prokuroreve vijnë pas dyshimeve për mosveprim lidhur me rastin e Arlinda Zekajt, e cila u vra më 25 tetor në Vitomiricë të Pejës, nga kunati i saj, sipas të dhënave të raportuara.

Vetëm tri ditë para vrasjes, Arlinda Zekaj kishte kërkuar ndërhyrje urgjente nga institucionet për të garantuar sigurinë e saj.

Së fundmi, mediat në Kosovë kanë publikuar edhe incizime audio, në të cilat ajo dëgjohet duke kërkuar ndihmë nga institucionet dhe duke shprehur shqetësimin për sigurinë e saj dhe të djalit.

Gjatë bisedës, Zekaj shpreh frikën se mund të vritej dhe paralajmëron se zyrtarët do të duhej të mbanin përgjegjësi nëse asaj i ndodhte diçka.