TIRANË — Studentët dhe të rinjtë protestues kanë nisur marshimin nga godina e Parlamentit drejt Ministrisë së Arsimit, duke shënuar ditën e 17-të të qëndresës së tyre me kërkesën e panegociueshme për dorëheqjen e Kryeministrit Edi Rama.

Marshimi drejt ministrisë pason grumbullimin e zhvilluar përpara Kuvendit në të njëjtën orë me nisjen e seancës plenare, ku pjesëmarrja e të rinjve ishte më e ulët krahasuar me tubimet e mëparshme.

Ndërkohë, edhe gjatë mëngjesit të sotëm, Kryeministri Edi Rama përsëriti thirrjen për dialog me përfaqësuesit e studentëve, por oferta është refuzuar sërish nga organizatorët e protestës.

Protesta e të rinjve, që mbështetet edhe nga pedagogët përmes bojkotit të mësimit në universitete, vazhdon të zhvillohet nën tensione pas përplasjeve të ditëve të fundit me forcat e rendit, shoqërimeve në polici dhe personave të lënduar. Te godina e Ministrisë së Arsimit pritet të shihet nëse marshuesve do t’u bashkohet edhe një grup tjetër protestuesish.