SHKODËR — Policia e Shkodrës ka finalizuar megaoperacionin antidrogë të koduar “POLINOMI”, i zhvilluar pas një hetimi 4-mujor në bashkëpunim me Prokurorinë e Rrethit Gjyqësor Shkodër.

Gjatë këtij operacioni janë sekuestruar 265.4 kilogramë lëndë e dyshuar narkotike Cannabis Sativa, 2 mina të dyshuara antitank, 7 aparate celularë si dhe 6 automjete. Detajet e aksionit u bënë publike gjatë një konference për shtyp nga Drejtuesi i Policisë Vendore Shkodër, Dashamir Spaho.

Në kuadër të goditjes së këtij grupi kriminal, janë arrestuar në flagrancë katër shtetas:

Admir Selgjekaj, 38 vjeç

Elsid Ramci, 25 vjeç

Bujar Kukaj, 56 vjeç

Naim Kukaj, 52 vjeç

Përveç të arrestuarve, janë shpallur në kërkim tre persona të tjerë: Esat Kukaj, 58 vjeç, Denjan Kukaj, 23 vjeç, dhe Arnaldo Mulleti, 39 vjeç.

Sipas njoftimit zyrtar të policisë, shtatë personat dyshohet se vepronin si grup i strukturuar për prodhimin, magazinimin, paketimin dhe trafikimin e sasive të mëdha të kanabisit drejt tregut vendas dhe atij ndërkombëtar. Ndërhyrja u krye në lagjen “Guraj” të Malësisë së Madhe, ku pas bllokimit të një automjeti tip “Volkswagen Passat” dhe kontrolleve në banesat e vëllezërve Bujar dhe Naim Kukaj, u gjet sasia e lëndës narkotike e përgatitur për shitje.

Në tokën në pronësi të Bujar Kukajt u zbuluan gjithashtu dy minat antitank, të cilat iu dorëzuan për ekzaminim të mëtejshëm forcave xheniere të Forcave të Armatosura. Hetimet e policisë treguan se pjesëtarët e familjes Kukaj merreshin me magazinimin dhe paketimin e lëndës narkotike, ndërsa tre personat e tjerë organizonin transportin dhe shitjen e saj.