TIRANË — Policia e Shtetit ka finalizuar një tjetër fazë të operacionit ndërkombëtar të koduar “The Wanted”, duke realizuar ekstradimin nga Gjermania drejt Shqipërisë të një 29-vjeçari të shpallur në kërkim për vepra të rënda penale.

Sipas njoftimit zyrtar, shtetasi Ardit Gjokrosa, lindur dhe banues në Mat, u ekstradua nga Frankfurti falë bashkëpunimit mes specialistëve të Interpol Tiranës dhe homologëve të Interpol Wiesbaden.

Gjykata e Posaçme e Shkallës së Parë për Korrupsionin dhe Krimin e Organizuar (GJKKO) i kishte caktuar 29-vjeçarit masën e sigurisë “Arrest në burg” që prej majit të vitit 2024.

I ekstraduari akuzohet për veprat penale “Sigurimi i kushteve dhe i mjeteve materiale për të kryer vrasje”, e kryer në formën e veçantë të bashkëpunimit, si dhe për “Grup të strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Gjokrosa akuzohet për sigurimin e kushteve dhe të mjeteve materiale për vrasjen e Hamza Terziut në 2020-ën.

"Ardit Gjokrosa, akuzuar për kryerjen e veprave penale:

“Sigurimi i kushteve dhe i mjeteve materiale për të kryer vrasje”, në dëm të shtetasit, Hamza Terziu, kryer në bashkëpunim të veçantë, atë të grupit të strukturuar kriminal, parashikuar nga nenet 80 e 28/4 të Kodit Penal;

“Grup i strukturuar kriminal”, në formën e pjesëmarrjes, parashikuar nga neni 333/a, paragrafi 2-të i Kodit Penal;

“Kryerja e veprave penale nga organizata kriminale dhe grupi i strukturuar kriminal”, të parashikuar nga neni 334 pika 1 i Kodit Penal" thuhej në një komunikatë të SPAK të 2025 që gjeni këtu.

I arrestuari i është dorëzuar autoriteteve shqiptare për procedim të mëtejshëm ligjor.