Studentët kanë vijuar edhe këtë të mërkurë protestën e tyre, duke shënuar ditën e 16-të të revoltës kundër qeverisë. Pas marshimit para Ministrisë së Arsimit dhe Kryeministrisë, një pjesë e protestuesve janë zhvendosur në zona të tjera të kryeqytetit.

Disa prej tyre janë grumbulluar pranë zonës së Zogut të Zi në Tiranë, ku kanë përsëritur thirrjet për ndryshim politik dhe dorëheqjen e kryeministrit Edi Rama.

Sipas protestuesve, largimi i kreut të qeverisë do të krijonte mundësi për ndryshime thelbësore në vend. Ata vijojnë të kërkojnë ndryshimin e situatës politike dhe hapjen e një rruge të re për Shqipërinë.

Protesta vijon në ditën e saj të 16-të, ndërsa studentët po zhvillojnë marshime dhe grumbullime në disa pika të kryeqytetit.

Deri më tani, nuk ka informacion të mëtejshëm mbi kohëzgjatjen e protestës pranë Zogut të Zi apo mbi zhvillimet e pritshme gjatë orëve në vijim.