ATLANTA, 28 Tetor 2026 — Fshirja e një bisede me asistentët e inteligjencës artificiale në telefonat inteligjentë nuk garanton automatikisht zhdukjen e plotë të informacionit nga pajisja. Një studim i ri i realizuar nga studiuesit e Institutit të Teknologjisë së Georgias (Georgia Tech) në SHBA ka zbuluar se të dhënat personale mund të mbeten në memorien operative të telefonit dhe të rikuperohen përmes mjeteve të specializuara.

Ekipi kërkimor ka zhvilluar një mjet eksperimental të quajtur ORISA, i cili arrin të rindërtojë fragmente bisedash të fshira nga asistentët AI që funksionojnë drejtpërdrejt në pajisje (on-device AI) në sistemin operativ Android. Gjatë një eksperimenti të kontrolluar me aplikacionin ChatterUI, studiuesit i dhanë një asistenti virtual 100 informacione fiktive dhe më pas i fshinë ato. Përmes analizimit të memories RAM ku modelet AI ruajnë përkohësisht të dhënat gjatë përpunimit, mjeti ORISA arriti të rikuperonte 26 nga 100 faktet origjinale, duke krijuar një seancë të re e funksionale.

Autorët e studimit, të cituar nga platforma teknologjike ZDNET, vënë në dukje se kjo teknologji mund të ndihmojë hetuesit e forensikës digjitale në hetimin e krimeve kibernetike ku përdoren modele lokale pa regjistrim në cloud. Megjithatë, ata paralajmërojnë se zbulimi ngre shqetësime serioze për privatësinë: nëse persona të paautorizuar marrin akses fizik ose të thelluar në memorien e telefonit, teknika të ngjashme mund të përdoren për të nxjerrë informacione konfidenciale. Studiuesit nënvizojnë se rikuperimi nuk është universal dhe varet nga koha e përdorimit të pajisjes, pasi të dhënat e reja mbishkruajnë përfundimisht memorien e vjetër.