Kryeministri Edi Rama ka paralajmëruar miratimin e buxhetit të ri të shtetit, i cili sipas tij do të kalojë për herë të parë vlerën prej 10 miliardë eurosh. Ai ka kritikuar publikimet në media për masat e reja fiskale, duke i cilësuar dokumentet e bëra publike si materiale pune të paplota.

TIRANË – Kryeministri Edi Rama ka reaguar lidhur me diskutimet për paketën e re fiskale, duke deklaruar se qeveria do të miratojë nesër buxhetin e ri të shtetit, i cili, sipas tij, do të tejkalojë për herë të parë pragun e 10 miliardë eurove.

Përmes një reagimi publik, Rama ka kritikuar informacionet e publikuara në media për ndryshimet e pritshme fiskale, duke pretenduar se ato bazohen në dokumente pune që kanë dalë në mënyrë të pjesshme.

“Flisni, flisni për masat e reja fiskale, grijeni sallatën tuaj të urrejtjes dhe padijes me dokumenta pune të dalë gjysma-gjysma, se nesër e ka radhën qeveria të thotë fjalën e saj me miratimin e buxhetit të parë në histori që kalon pragun e 10 miliardë Eurove dhe paketës më ambicioze të rishpërndarjes së rritjes ekonomike”, shkruan kryeministri.

Sipas Ramës, buxheti i ri do të shoqërohet me një paketë të gjerë masash për rishpërndarjen e përfitimeve nga rritja ekonomike.

Kryeministri nuk ka dhënë në këtë reagim detaje konkrete për masat fiskale që do të përfshihen në paketën e re, duke lënë të kuptohet se qëndrimi zyrtar i qeverisë do të bëhet publik me miratimin e dokumenteve.

Pritet që prezantimi i buxhetit dhe paketës fiskale të sqarojë ndryshimet e propozuara, ndikimin e tyre në financat publike dhe kategoritë që do të përfitojnë nga masat e reja.