Kreu i shtetit kinez uron Lula da Silva-n për rizgjedhjen si President i Brazilit

Presidenti i Kinës Xi Jinping i dërgoi të martën një mesazh urimi Luiz Inácio Lula da Silva për rizgjedhjen e tij si President i Republikës Federative të Brazilit.

Xi vlerëson në mesazh se Presidenti Lula ka dhënë një kontribut të rëndësishëm në zhvillimin e marrëdhënieve Kinë-Brazil.

"Vitet e fundit, unë dhe Presidenti Lula kemi ruajtur komunikim të ngushtë në forma të ndryshme, si dhe kemi udhëhequr së bashku progresin në ndërtimin e një komuniteti Kinë-Brazil me të ardhme të përbashkët për një botë më të drejtë dhe një planet më të qëndrueshëm", thotë Xi dhe vazhdon:

"Dimensioni global, strategjik dhe afatgjatë i marrëdhënieve dypalëshe është bërë gjithnjë e më i dukshëm, ndërsa bashkëpunimi Kinë-Brazil është bërë një shembull solidariteti dhe bashkëpunimi mes vendeve të Jugut Global".

Kreu i shtetit tha se vendi që drejton i kushton rëndësi të madhe zhvillimit të marrëdhënieve me Brazilin dhe është i gatshëm për të punuar së bashku me homologun brazilian për ta çuar në një nivel të ri ndërtimin e komunitetit me të ardhme të përbashkët, për të zgjeruar perspektivat e bashkëpunimit të gjithanshëm strategjik mes dy vendeve dhe për të përmirësuar vazhdimisht mirëqenien e dy popujve.

Në kuadrin e mesazheve të urimit, këtë e ka bërë sot dhe zëvendëspresidenti i Kinës Han Zheng, i cili i dërgoi gjithashtu një mesazh urimi Geraldo Alckmin për rizgjedhjen e tij si zv/President i Brazilit.