TRABZON — Një duel me shtatë gola dhe përmbysje spektakolare ka karakterizuar sfidën e kampionatit turk mes Rizesporit dhe Trabzonsporit, me dy futbollistët e Kombëtares shqiptare, Ernest Muçi dhe Qazim Laçi, që u kthyen në protagonistët kryesorë të mbrëmjes.

Rizespori e mbylli pjesën e parë në avantazh të dyfishtë falë dy golave të Gennaro Borrellit në minutat 12 dhe 32. Megjithatë, Trabzonspori reagoi fuqishëm pas pushimit. Melih Kabasakal ngushtoi diferencën në minutën e 49-të, ndërsa Aral Şimşir barazoi shifrat dy minuta më vonë, ku të dy golat erdhën pas asistimeve të Ernest Muçit. Në minutën e 57-të, Franculino kaloi miqtë në avantazh pas një aksioni ku Muçi ishte sërish përcaktues.

Rizespori u rikthye përkohësisht në lojë në minutën e 68-të, kur Qazim Laçi realizoi një goditje spektakolare nga distanca duke mposhtur portierin André Onana për shifrat 3-3. Sidoqoftë, në minutën e 83-të, Muçi dhuroi asistin e tij të tretë personal për Franculino-n, i cili vulosi fitoren 4-3 për Trabzonsporin.

Me këtë sukses, Trabzonspori regjistroi fitoren e katërt radhazi duke u ngjitur në kuotën e 19 pikëve, ndërsa Rizespori mbetet në kuotën e 10 pikëve pas humbjes së tretë radhazi.