MOSKË, 26 Tetor 2026 — Presidenti rus Vladimir Putin ka hedhur poshtë kategorikisht pretendimet se Moska po orkestron protestat masive që kanë përfshirë qytetet e mëdha europiane, duke i cilësuar ato si një “ekzagjerim të qartë” dhe një përpjekje të liderëve perëndimorë për të fshehur dobësinë e tyre.

Në një intervistë dhënë transmetuesit rus VGTRK, kreu i Kremlinit u shpreh i habitur se si reagimet e para të qarqeve evropiane nuk u drejtuan fillimisht kundër Rusisë, por kundër Shteteve të Bashkuara të Amerikës, duke aluduar për mbështetjen e Uashingtonit ndaj lëvizjeve të djathta. Sipas tij, vetëm më vonë akuzat u riorientuan sërish ndaj Moskës, sipas një modeli të përsëritur ku “Rusia akuzohet gjithmonë për të gjitha mëkatet e mundshme”.

Putin i ka quajtur këto akuza si një dëshmi e paaftësisë së drejtuesve politikë europianë për të marrë përgjegjësi dhe për të analizuar shkaqet e vërteta të pakënaqësisë qytetare brenda vendeve të tyre, duke preferuar t’ia faturojnë problemet aktorëve të jashtëm.

Nga ana tjetër, tensionet mbi këtë çështje janë ngritur edhe në rrafshin diplomatik. Gjatë një konference të organizuar më 21 tetor nga OECD, ministri i Jashtëm francez, Jean-Noël Barrot, deklaroi se protestuesit në Francë po ushqehen nga narrativa armiqësore që vijnë nga Rusia, Kina, Irani dhe komuniteti MAGA.

Këto pretendime ishin hedhur poshtë më parë edhe nga zëdhënësi i Kremlinit, Dmitry Peskov, i cili i cilësoi akuzat si absurde, ndërsa presidenti amerikan Donald Trump i ka lidhur trazirat e fundit në Perëndim me sfidat e migracionit masiv.