Studentët e mbledhur në protestë kanë përcjellë mesazhet e tyre kundër kryeministrit Edi Rama dhe qeverisë përmes pankartave dhe shkrimeve ironike, duke shprehur pakënaqësinë ndaj situatës politike dhe mënyrës së trajtimit të protestave.

Përmes mesazheve të vendosura në mure dhe pankartave të mbajtura gjatë tubimit, të rinjtë kanë ironizuar edhe tryezën e dialogut të vendosur nga kryeministri përpara godinës së institucionit.

Në disa prej pankartave, studentët kanë drejtuar akuza ndaj Policisë së Shtetit për dhunë gjatë protestave, duke kërkuar që shqetësimet dhe kërkesat e tyre të merren seriozisht.

Vëmendje kanë tërhequr edhe mesazhet që lidhen me zhvillimet politike në Serbi. Studentët kanë përdorur situatën e lëvizjes studentore atje si pikë krahasimi me realitetin politik në Shqipëri, duke përcjellë idenë se edhe të rinjtë shqiptarë mund të ndikojnë në ndryshimin e situatës përmes protestave.

Një tjetër mesazh u drejtohet drejtpërdrejt kryeministrit, duke kundërshtuar perceptimin se të rinjtë përbëjnë një brez të paaftë dhe duke theksuar vendosmërinë e tyre për të kërkuar ndryshim.

“Premtimet në Bruksel, realiteti në Tiranë. I dashur kryeministër, unë 7 fjalë di t’i lidh. Më testo dhe do të shohësh se nuk jemi brezi i të paaftëve. Rinia do të fitojë herët a vonë”, thuhet në një prej pankartave të protestuesve.

Përmes këtyre mesazheve, studentët kanë shprehur kundërshtimin ndaj qeverisë dhe kanë theksuar se do të vijojnë të kërkojnë ndryshime, duke e kthyer protestën në një hapësirë për shprehjen e pakënaqësisë dhe qëndrimeve të tyre.