Dhuna e ashpër policore ndaj shumë protestuesve, pjesa më e madhe studentë, ka detyruar Prokurorinë e Përgjithshme të nisë një hetim të thelluar ndaj policëve, një pjesë e të cilëve, pasi morën 3 mijë euro shpërblim nga Rama për devotshmërinë e tyre, tani pritet të marrin ndëshkime që shkojnë deri dhe vite burgim.

Prokuroria pranë Gjykatës së Shkallës së Parë të Juridiksionit të Përgjithshëm, Tiranë konfirmoi sot se ka regjistruar kryesisht (pa denoncim, por me iniciativën e saj) procedimin penal nr.7806, të vitit 2026, për veprat penale të parashikuara nga nenet 248 dhe 250 të Kodit Penal.

Procedimi i parë lidhet me plagosjen e të riut Erion Vishkulli nga Elbasani të cilit policia i nxori syrin duke bërë që ti humbasë shikimi gjatë protestave të zhvilluara në kryeqytet.

Ngjarja ndodhi të shtunën 24 tetor dhe nga ana e Prokurorisë pranë Gjykatës së Shkallës së Parë të Juridiksionit të Përgjithshëm Tiranë janë kryer veprimet e nevojshme hetimore, ndër të cilat si administrimi i pamjeve filmike të vëna në dispozicion nga Banka e Shqipërisë, marrja e kartelës mjekësore pranë Spitalit Universitar të Traumës, si dhe kryerja e veprimeve hetimore në bashkëpunim me Agjencinë e Mbikëqyrjes Policore (AMP).

Gjithashtu, në kuadër të hetimeve po punohet për përcaktimin e mënyrave konkrete të komunikimit me autoritetet italiane, me qëllim përcjelljen e një letërporosie drejtpërdrejt pranë këtyre autoriteteve.

Hetimet vijojnë për sqarimin e plotë të rrethanave të ngjarjes dhe dokumentimin e saj në përputhje me parashikimet ligjore në fuqi.

Gjithashtu po hetohen dhe po kryhen veprime në lidhje me dëmtimin e disa shtetasve, pas dyshimeve për përdorimin joproporcional të forcës nga disa punonjës të policisë së shtetit në protesta.

Deri në këtë fazë janë administruar rreth 20 kartela mjekësore të shtetasve të dëmtuar dhe po kryen verifikimet për këto raste me Agjencinë e Mbikëqyrjes Policore (AMP).