Përfaqësues të shoqërisë civile, intelektualë, avokatë dhe studentë kanë dorëzuar një kallëzim penal në Prokurorinë e Posaçme (SPAK), duke kërkuar hetimin e rasteve të pretenduara të dhunës policore gjatë protestave të fundit.

Kallëzimi është dorëzuar zyrtarisht këtë të hënë dhe synon nisjen e hetimeve për identifikimin dhe vënien para përgjegjësisë ligjore të zyrtarëve policorë që dyshohet se kanë ushtruar dhunë ndaj protestuesve.

Sipas materialeve të paraqitura pranë SPAK-ut, në kallëzim janë përfshirë mbi 180 episode të dokumentuara, që lidhen me veprime të pretenduara të paligjshme dhe përdorim të forcës gjatë tubimeve.

Përfaqësuesit e shoqërisë civile dhe grupi i avokatëve argumentojnë se rastet e paraqitura nuk duhen trajtuar si incidente të izoluara, por kërkojnë që ato të shqyrtohen në kuadër të një hetimi të plotë mbi mënyrën e ndërhyrjes së strukturave policore gjatë protestave.

Ata i kanë bërë thirrje publike SPAK-ut që të zhvillojë një hetim të shpejtë, të plotë dhe të paanshëm, duke verifikuar provat e paraqitura dhe duke përcaktuar përgjegjësitë individuale në përputhje me ligjin.

Dorëzimi i kallëzimit shënon një hap zyrtar në përpjekjen e përfaqësuesve të shoqërisë civile, avokatëve dhe studentëve për të kërkuar hetimin e episodeve të denoncuara të dhunës gjatë protestave.