Policia e Shtetit ka nxjerrë një shkresë urgjente drejtuar komisariateve të Tiranës dhe strukturave policore në Krujë, duke kërkuar zbatimin e masave ligjore për garantimin e të drejtave të të miturve të përfshirë në procedurat policore, në kuadër të protestave të fundit studentore.

Në dokumentin e Drejtorisë Vendore të Policisë Tiranë, drejtuar komisariateve nr. 1, 2, 3, 4, 5, 6 dhe 7, theksohet detyrimi për respektimin e Kodit të Drejtësisë Penale për të Mitur dhe të akteve të tjera ligjore në fuqi.

Një ndër pikat kryesore të shkresës lidhet me identifikimin e punonjësve të policisë gjatë ushtrimit të detyrës. Udhëzimi kërkon që efektivët të jenë të identifikueshëm përmes numrit përkatës, ndërsa identifikimi i automjeteve policore duhet të garantohet gjatë operacioneve.

Policia kërkon gjithashtu bashkëpunim me strukturat përgjegjëse për trajtimin e rasteve që përfshijnë të mitur, me qëllim shmangien e mbajtjes së tyre për periudha të panevojshme dhe respektimin e afateve të përcaktuara nga ligji.

Vëmendje e veçantë i kushtohet kontrollit të telefonave celularë. Sipas shkresës, kontrolli duhet të kryhet në përputhje me kërkesat ligjore dhe nuk duhet të bëhet pa urdhër gjyqësor, kur ky urdhër kërkohet nga ligji. Edhe çdo kërkesë për përgjim duhet të mbështetet në bazën ligjore përkatëse.

Një tjetër kërkesë lidhet me garancitë që duhet të ofrohen gjatë procedurave me të miturit. Për çdo rast duhet të sigurohet prania e prindit ose kujdestarit ligjor dhe e psikologut, sipas parashikimeve ligjore. Përpara nisjes së marrjes në pyetje, duhet të plotësohet edhe formulari për informimin e të miturit mbi të drejtat e tij.

Shkresa parashikon gjithashtu mbajtjen e një regjistri të veçantë për këto raste, si dhe plotësimin e regjistrave të shoqërimit me të gjitha të dhënat e nevojshme për dokumentimin e procedurave policore.

Në dokument theksohet edhe detyrimi për zbatimin e rregullave ligjore që përcaktojnë përdorimin proporcional të forcës dhe të gazit lotsjellës gjatë operacioneve policore.

Në përfundim, drejtuesit e Policisë së Shtetit kërkojnë zbatimin e të gjitha masave të përcaktuara, me qëllim që veprimet policore gjatë protestave të zhvillohen në përputhje me legjislacionin në fuqi dhe me garancitë ligjore për mbrojtjen e të miturve.