PRISHTINË — Lëvizja Vetëvendosje ka nisur mbledhjen e nënshkrimeve për të thirrur një seancë të jashtëzakonshme në Kuvendin e Kosovës, pas vrasjes tragjike të Arlinda Zekajt nga kunati i saj në Pejë.

Shefja e Grupit Parlamentar të Vetëvendosjes, Arbërie Nagavci, bëri me dije se hapi i parë do të jetë formimi i një komisioni hetimor parlamentar, me synim hetimin e plotë të zinxhirit të përgjegjësisë institucionale dhe dështimit në mbrojtjen e viktimës.

Arlinda Zekaj u vra vetëm dy orë pasi kishte denoncuar sërish dhunën në familje pranë organeve të rendit. Tre ditë përpara ngjarjes së rëndë, ajo i ishte drejtuar me një letër paralajmëruese Prokurorisë së Pejës, ku shprehte pakënaqësinë dhe shqetësimin mbi mënyrën se si zyrtarët po e trajtonin rastin e saj.